Hebrews 3

Krais iion le kimaing i mukal rintet nge a Moses iion le kimaing

(Vonge 3�4:13)

Jisas i mukal mun nge a Moses.

1Na titeikre, riong alavusnga ako tho ri nge lale kene i nunganga, ako thomu o riri a God itheki lale, na i lenga mun thomu ve, aro o el mun ur sivesivengare a Pen a Urvet. Maken aro lomumu rum ol inga nge a Jisas ini ao. I kene ini a God ile pakeke ako i pakeu i me ve aro i sung esu ile riong a it nge. Na i ranga ve ini mun i Pris Pomnga ako i wola tokokoere a God nge la. ▼

▼1 O thepol a Hibru 5:1.

Na lemimemo ol nge ile riong aken na them panongpol ol i a tokokoere nge. 2Na God i ateal i nge ile omaing aken, ma i panes selele i ranga ve ako God i ria i nge, ranga ve mun ako nge a Moses ako i panes selele omaing ako God i sungu i a i nge, nge ile wainlangaere othealnga. 3Na ranga ve ako toko ako i pavelpol wainlangaere kene iion i kima ol nge ile wainlanga areken, Jisas iion mun i kima ol nge a Moses iion, eneke Jisas i pavelpol a God ile wainlangaere, ave Moses ini othealnga inga. 4Na i nunganga ako toko omole omole o pavelpol ole wainlangaere, ave ini a God ako ini ur alavusnga tepun pavelpolnga.

5Na i nunganga ako Moses i panes selele omaing alavusnga ako God i sungu i a i nge, nge ile wainlangaere othealnga, aveto ini inga a God ile umonga. Na ile omaing aken i ritet nge ur ako God aro i oma i a ikime ol me. 6Aveto Krais i mukal nge a Moses, eneke i mun kene i panes selele omaing alavusnga ako God i sungu i a i nge, nge ile wainlangaere othealnga, aveto ini a God ile umonga avele, ini a God Itun ako i theal or. Na it kene it ini a God ile wainlangaere, tova te mit engeng nge ler lemioong na te men sial nge ur sivesivenga areko God aro i sungu i a it nge panen, ini ur ako ler maral nge ripotnga avele.

Aro te lel kimer nge a God ranga ve ako Israelre o oma i nomenga, kene avele, aro vene mo te el a God ile thauong aken mun avele.

7Na thomu ini a God ile wainlangaere venen aken, maken aro thomu o nongal riong ako Oni Riringa i ri nge ve,

“Na ponange aro ve thomu o nongpol a God ikei,
8na o mothong tova o krim tuntun opomu,
ranga ve ako titovumuere o oma i nomenga
nge ako o lel okime nge a God,
na o tongporum i nge ole vothung
nge ole esong a pen polpolnga.
9 Na titovumuere o thepol lek omaing aolongaere
a pen aken,
i pavurvur nge tovu po or mule pa penel,
aveto o tongporum inga tho
nge ole vothung kerenga.
10 Na aken ini tepun ako i oma tho
ma lemik kling nge or,
mako tho ri vene,
‘Evelelnga olemi es mela e tho,
na o panes ol vothung
ako tho sis ve aro o oma i, kene avele.’
11 Na lemik kling venen aken nge or,
mako tho kin lek riong ve,
‘I pavurvur ako aro o eso ol a lek thauong lemi avele ol.’”
Buk Song 95:7-11

12Na titeikre, aro o panes ole vothung aken avele, aro thomu o naktet thomu mo omu e i mothong tova ilemi kerenga, mo i pakerenga ile lemioong, mako i lel ikime nge a God ako i mimi evelelnga, naro i paomelal tokokoere nge ole vothung kerenga. 13Aveto aro thomu o paengeng pel sivengomu nge nang elonga, i pavurvur nge nang alavusnga ako God i sungu i a thomu nge, ako tokokoere o apet i ve ini “Ponange.” Aro thomu o oma venen aken mo aro vothung kerenga i mothong tova i paleklek omu e ilemi, mo i lel ikime nge a God. 14Naro thomu o oma venen aken, eneke aro ve ler lemioong i engeng ranga ve nge nang ako te elo a Krais a lemir, na i mul nge ler rinong, aken aro te supo tomo nge a Krais ile ur sivesivengare elnga ako nge ler teoong a i nge. 15Na i ranga ve ako God ile erere i ri nge ve,

“Na ponange aro ve thomu o nongpol a God ikei,
na o mothong tova o krim tuntun opomu,
ranga ve ako titovumuere o oma i nomenga
nge ako o lel okime nge a God.”
Buk Song 95:7-8

16Na ini anga areko o nongpol nunganga a God ikei, aveto o lel okime a i nge, e? Ini titovumuere ako Moses i woltetpot or a Isip me. 17Na God ilemi klingtun angare nge tovu po or mule pa penel aken, e? Ini mun re ako ini titovumuere ako o oma vothung kerenga aken, mako o rin a pen polpolnga. 18Na God i kin ile riong ve,

“I pavurvur ako aro o eso a lek thauong lemi avele ol.”
Na i kin ile riong aken tomo nge angare, e? Ini areko o avsa ile riong. 19Na i venen aken, mako lemir mire ako ve, o pavurvur ako aro o eso a ile thauong lemi avele, eneke ole lemioong i voth pis nge a God avele.